ໃນລະຫວ່າງວັນທີ 12-16 ມີຖຸນາ(6) 2023 ທີ່ຜ່ານມາ ສະມາຄົມສົ່ງເສີມສຸຂະພາບຄອບຄົວ ແລະ ທີມງານຄູຝຶກ ຈາກກະຊວງສາທາລະນະສຸກ ໄດ້ມີການຈັດຕັ້ງປະຕິບັດກິດຈະກໍາ ຝຶກອົບຮົມທົບທວນຄືນ ກ່ຽວກັບ ການດູແລເດັກເກີດໃໝ່ໃຫ້ແກ່ພະນັກງານແພດ ໂຮງໝໍນ້ອຍ 17 ແຫ່ງ ຂອງ 2 ເມືອງຄື: ເມືອງດາກຈື້ງ: 10 ໂຮງໝໍນອ້ຍ ແລະ ເມືອງກະລຶມ: 7 ໂຮງໝໍນອ້ຍ, ຫຼັງຈາກຝຶກອົບຮົມແລ້ວ ແມ່ນໄດ້ລົງ ຕິດຕາມຊຸກຍູ້ທີມງານ ໃນສະຖານທີ່ການບໍລິການເພື່ອປັບປຸງສະຖານທີ່ການບໍລິການ ໃນການຕອບສະນອງ ແກ່ຜູ້ມາຮັບການບໍລິການ ແລະ ໄດ້ລົງຢ້ຽມຢາມບ້ານຂອງຜູ້ມາຮັບການບໍລິການ ທີ່ໂຮງໝໍນອ້ຍ ຊຽງຫຼວງ ແລະ ໂຮງໝໍນອ້ຍ ຕັ່ງເຢີ່ງ ເມືອງດາກຈື້ງ ແຂວງເຊກອງ

ຈຸດປະສົງແມ່ນ ເພື່ອເປັນການເພີ່ມທັກສະ ໃນການຊ່ວຍເກີດໃຫ້ພະນັກງານໂຮງໝໍນ້ອຍ ໃຫ້ມີຄວາມເຂັ້ມແຂງ ແລະ ຊໍ່ານານ ທາງດ້ານວິຊາການ ແລະ ຄຸນນະພາບການບໍລິການ ໃຫ້ດີຂື້ນກວ່າເກົ່າ , ເພື່ອໃຫ້ຜູ້ບໍລິການ ແລະ ຜູ້ມາໃຊ້ບໍລິການ ໄດ້ມີສະຖານທີ່ບໍລິການ ທີ່ມີຄວາມສະອາດ, ປອດໄພ, ຄວາມພ້ອມ, ຄວາມເປັນມິດຕໍ່ແມ່ແລະ ເດັກ ແລະ ນອກຈາກນັ້ນ ກໍມີຄວາມເຄົາລົບນັບຖືຕໍ່ຜູ້ມາໃຊ້ບໍລິການຢູ່ໂຮງໝໍນ້ອຍ, ເພື່ອເຮັດໃຫ້ຊຸມຊົນມີຄວາມເຊື່ອໝັ້ນໃນການໃຫ້ບໍລິການຂອງແພດໝໍ ຈຶ່ງເຮັດໃຫ້ຊຸມຊົນເຂົ້າມາໃຊ້ບໍລິການຢູ່ສະຖານທີ່ບໍລິການ ຫຼື ໂຮງໝໍນ້ອຍຫຼາຍຂຶ້ນ ເຊັ່ນ: ມາຝາກທ້ອງ, ເກີດລູກ, ກວດຫຼັງເກີດ, ສັກຢາ ແລະ ອື່ນໆ. ນອກຈາກນັ້ນທີມງານກໍໄດ້ລົງໄປຢ້ຽມຢາມບ້ານ ຂອງຜູ້ມາຮັບການບໍລິການ ເກີດລູກໃນສະຖານທີ່ໂຮງໝໍນອ້ຍ ຊຽງຫຼວງ ແລະ ໂຮງໝໍນອ້ຍ ຕັ່ງເຢີ້ງ ເພື່ອຢ້ຽມຢາມຖາມຂ່າວຫຼັງຈາກ ມາໃຊ້ບໍລິການ ໃນການເກີດລູກ ແລະ ນອກຈາກນັ້ນແພດໝໍກໍໄດ້ ມີການໃຫ້ຄໍາປຶກສາ ແລະ ໃຫ້ສຸຂະສຶກສາ ແນະນຳ ການດູແລເດັກເກີດໃໝ່ ແລະ ແມ່ຫຼັງເກີດລູກ ທາງດ້ານໂພຊະນາການ ຂອງແມ່ ແລະ ເດັກ

ຫຼັງຈາກນັ້ນ ທີມງານທຸກທ່ານ ທີ່ໄດ້ລົງຢ້ຽມຢາມ ໃນຄັ້ງນີ້ ກໍໄດ້ຊ່ວຍກັນຈັດສັນສະຖານທີ່ການບໍລິການ ໃຫ້ເປັນລະບຽບຂື້ນກວ່າເກົ່າ ທີ່ໂຮງໝໍນ້ອຍ ຊຽງຫຼວງ ແລະ ໂຮງໝໍນອ້ຍ ຕັ່ງເຢີ້ງ ເພື່ອເປັນຕົວຢ່າງ ແລະ ເປັນທິດທາງໃນການປັບປຸງ ໃຫ້ແກ່ໂຮງໝໍນອ້ຍ ອຶ່ນໆ ໃນເມືອງ ດາກຈື້ງ ແລະ ເມືອງກະລຶມ ທີ່ແຂວງເຊກອງ ໃຫ້ໄດ້ມີສະຖານທີ່ການບໍລິການ ທີ່ມີຄຸນນະພາບຂຶ້ນຕຶ່ມນໍາພາທີມໂດຍ ດຣ ບົວວັນ ສົມສະໜິດ ຈາກ ສະມາຄົມສົ່ງເສີມສຸຂະພາບຄອບຄົວ, ທີມຄູຝຶກ ຈາກກະຊວງສາທາລະນະສຸກ, ພະນັກງານ ອົງການ ແຄສາກົນ ປະຈຳລາວ, ແພດປະສູດ ຈາກໂຮງໝໍແຂວງເຊກອງ ໂຮງໝໍເມືອງ ດາກຈື້ງ ແລະ ໂຮງໝໍເມືອງກະລຶມ ແລະ ທິມງານໂຮງໝໍນອ້ຍ 17 ແຫ່ງ, ໂດຍມີຜູ້ເຂົ້າຮ່ວມທັງໝົດ: 33 ທ່ານ /ຍິງ 27 ທ່ານ

ໃນການລົງຈັດຕັ້ງປະຕິບັດກິດຈະກຳໃນຄັ້ງນີ້ ແມ່ນໄດ້ຮັບທຶນສະໜັບສະໜູນຊ່ວຍເຫຼືອຈາກ ອົງການແຄ ສາກົນ ປະຈຳລາວ, ພາຍໃຕ້ ໂຄງການ “ໂພຊະນາການ 1000 ວັນທຳອິດຂອງຊິວິດ”.

ໃນລະຫວ່າງ ວັນທີ່ 15 ພຶດສະພາ 2023 ສະມາຄົມສົ່ງເສີມສຸຂະພາບຄອບຄົວ ໃນນາມໂຄງການ ຮ່ວມແຮງຮ່ວມໃຈ ຕ້ານ ແລະ ສະກັດກັ້ນພະຍາດໂຄວິດ-19 ໃນເຂດທີມີຄວາມສ່ຽງ. ໄດ້ຈັດກິດຈະກໍາສະໜັບສະໜູນການປັບປຸງສວນຜັກຂອງໂຮງຮຽນ ມປາຍຊົ່ນເຜົ່າເມືອງວຽງພູຄາ ໃຫ້ເປັນສູນກາງຮຽນຮູ້ແລະສວນຜັກຕົວແບບຂອງເມືອງວຽງພູຄາ ເຊີ່ງໄດ້ເລິ່ມການປັບປຸງ ຕັ້ງແຕ່ວັນທີ່ 15 ພຶດສະພາ 2023 ເປັນຕົ້ນມາ ເຊີ່ງໃນການປັບປຸງສວນຜັກດັ່ງກ່າວ ແມ່ນມີລາຍການດັ່ງນີ້ : ການປັບປຸງຮົ້ວອ້ອມໜານຜັກ, ເຮືອນຮົ່ມບົ່ມຝຸ່ນ 1 ຫຼັງ, ສວນຜັກຈຳນວນ 170 ໜານ, ອ່າງເກັບນ້ຳເສຍເພື່ອຫົດຜັກ ແລະ ກະດານຂ່າວ ເຊີ່ງມີການຕິິິດຕາມ-ຊຸກຍູ້ຂອງພະນັກງານໂຄງການພາກສະໜາມ ແລະ ອຳນວຍການໂຮງຮຽນມປາຍຊົນເຜົ່າຢ່າງໃກ້ຊິດຕິດແທດໃນຊ່ວງໄລຍະການກໍ່ສ້າງແລະປັບປຸງເປັນໄລຍະ.

ໃນລະຫວ່າງ ວັນທີ່ 5-6 ມິຖຸນາ 2023 ສະມາຄົມສົ່ງເສີມສຸຂະພາບຄອບຄົວ ໃນນາມໂຄງການ ຮ່ວມແຮງຮ່ວມໃຈ ຕ້ານ ແລະ ສະກັດກັ້ນພະຍາດໂຄວິດ-19 ໃນເຂດທີມີຄວາມສ່ຽງ. ໄດ້ຈັດກິດຈະກໍາຝຶກອົບຮົມ ການປູກຜັກຕາມລະດູ, ການເຮັດຝຸ່ນບົ່ມ ແລະ ການລ້ຽງໄກ່ ໃຫ້ແກ່ນັກຮຽນ-ຄູອາຈານ ແລະ ປະຊາຊົນຊຸມຊົນເປົ້າໝາຍໂຄງການໃນ 4 ບ້ານເທດສະບານ ເມືອງວຽງພູຄາ ແຂວງຫຼວງນ້ຳທາ ໄດ້ຮັບກຽດເປັນປະທານຊຸດອົບຮົມໂດຍທ່ານ ສົມຫວັງ ພົມມະນີສອນ ຮອງຫົວໜ້າຫ້ອງການສຶກສາທິການແລະກິລາເມືອງ ແລະ ທ່ານ ແສງເພັດ ທະບັນດິດ ຜຸ້ບໍລິຫານແຜນງານ ສສສຄ. ເຊີ່ງມີຜູ້ເຂົ້າຮ່ວມຈາກຊຸມຊົນເປົ້າໝາຍ 4ບ້ານ, ອຳນາດການປົກຄອງບ້ານ, ຄູ-ອາຈານ ແລະ ນ້ອງນັກຮຽນຈາກ ໂຮງຮຽນ ມປາຍຊົນເຜົ່າ – ມສ ເທດສະບານເມືອງເຂົ້າຮ່ວມຈໍານວນ 51 ຄົນ ເປັນຍິງ 28 ຄົນ. ໃນການຝຶກອົບຮົມໄດ້ຮຽນຮູ້ດ້ານທິດສະດີ ແລະ ການປະຕິບັດຕົວຈິງໃນການເຮັດໜານຜັກ-ຝຸ່ນບົ່ມ ແລະ ການສັກຢາວັກຊີນໃຫ້ໄກ່ ໂດຍການເປັນຄູຝຶກຈາກ ວິຊາການຫ້ອງການກະສິກຳແລະປ່າໄມ້ເມືອງວຽງພູຄາ.

ໄດ້ຮັບທຶນສະໜັບສະໜູນໂດຍສະຫະພາບເອີຣົບໃນ ສປປ ລາວ MOU ກັບກະຊວງສາທາລະນະສຸກ – ກົມຄວບຄຸມພະຍາດຕິດຕໍ່. ຈັດຕັ້ງປະຕິບັດຮ່ວມກັນໂດຍ: ອົງການ Plan ສາກົນ ເຢຍລະມັນ – Plan ລາວ, ສະມາຄົມສຸຂະພາບຊຸມຊົນ ແລະ ການມີສ່ວນຮ່ວມ (CHias), ສະມາຄົມພັດທະນາກະສິກໍາ ແລະສິ່ງແວດລ້ອມແບບຍືນຍົງ (SAEDA), ຮ່ວມມືກັນຢ່າງໃກ້ຊິດກັບ ກະຊວງແຮງງານ ແລະ ສະຫວັດດີການສັງຄົມ ແລະ ກະຊວງອື່ນໆ ແລະ ຄະນະສະເພາະກິດ ຂອງລັດຖະບານ, ປະສານງານຜ່ານ LCCO.

     ໃນ ວັນທີ່ 2 ມິຖຸນາ 2023 ສະມາຄົມສົ່ງເສີມສຸຂະພາບຄອບຄົວ ໃນນາມໂຄງການ ຮ່ວມແຮງຮ່ວມໃຈ ຕ້ານ ແລະ ສະກັດກັ້ນພະຍາດໂຄວິດ-19 ໃນເຂດທີມີຄວາມສ່ຽງ. ໄດ້ຈັດກິດຈະກໍາສະໜັບສະໜູນການລ້ຽງໄກ່ ໃຫ້ແກ່ກຸ່ມເປົ້າໝາຍ 4 ບ້ານຄື: ບ້ານທ້ຽວ, ບ້ານວຽງສະຫວ່າງ, ບ້ານດົງວຽງ ແລະ ບ້ານໃຫມ່ ເມືອງວຽງພູຄາ ແຂວງຫຼວງນ້ຳທາ ເຊີ່ງໃນນີ້ໄດ້ຮັບກຽດເປັນປະທານຊີ້ນຳຂອງທ່ານ ບຸນມາ ພິລະວົງ ຫົວໜ້າຫ້ອງການກະສິກຳ ແລະ ປ່າໄມ້ເມືອງວຽງພູຄາ ແລະ ທ່ານ ດຣ ນາງ ສົມປອງ ອາດທອງ ຫົວໜ້າຫ້ອງການສາທາລະນະສຸກແຂວງ, ມີທັງ ອຳນາດການປົກຄອງບ້ານ, ປະຊາຊົນກຸ່ມເປົ້າຫມາຍ, ພະນັກງານລັດຂັ້ນແຂວງ-ຂັ້ນເມືອງ ແລະ ພະນັກງານໂຄງການເຂົ້າຮ່ວມ.

 

ການສະໜັບສະໜູນດັ່ງກ່າວລວມມີ: ພັນໄກ່ລາດພື້ນບ້ານຈຳນວນ 240 ໂຕ, ຫົວອາຫານ ຈຳນວນ 12 ເປົາ, ຢາສັກວັກຊີນ ແລະ ອຸປະກອນຈໍານວນ 12 ຊຸດ ລວມມູນຄ່າທັງໝົດ 27,816,000 ກີບ.